2014

Marija, messatge dau 25 de decembre de 2014

« Enfants carits, uòi encara, dins mos braces vos porgissi mon Filh Jèsus e li demandi la patz per vosautres e la patz entre vosautres. Pregatz e asoratz mon Filh per fins que dintre dins vòstres còrs sa patz e sa jòia. Prègui per vosautres per que siaguètz totjorn mai dobèrts a la pregària. Mercés d’aver respondut a ma crida. »

Jakov, messatge dau 25 de decembre de 2014

« Enfants carits, uòi per aqueste jorn de gràcias, vòli que lo còr de cadun de vosautres venga l’establoneta de Betelèn que lo Salvador dau mond i es nascut. Siái la vòstra maire que vos aima tant talament e que se fa de laguis per cadun de vosautres. Es per aquò, mos enfants, abandonatz vos a la Maire que pòsqui despausar davant lo Pichòt Jèsus lo còr e la vida de cadun de vosautres ; qu’aital solament, mos enfants, vòstres còrs testimonharàn de la naissença cada jorn de Dieu en vosautres. Balhatz a Dieu d’illuminar vòstras vidas de lutz e vòstres còrs de jòia, per que vòstre camin siague tot lo temps esclairat e que siaguètz un exemple de la jòia vertadièira per los autres que vivon dins las tenèbras e que son pas dobèrts a Dieu ni mai a sas gràcias. Mercés d’aver respondut a ma crida.»

Mirjana, messatge dau 2 de decembre de 2014

« Enfants carits ! Rementatz vos aquò -que o vos disi- l’amor vencerà. Sabi que fòrça demest vosautres son a pèrdre l’esperança per çò que veson a l’entorn d’eles patiment, dolor, gelósia e enveja… Mas siái la vòstra Maire. Siái dins lo Reialme mas siái a l’encòp aquí amb vosautres. Mon Enfant me manda tornarmai per vos ajudar. Es per aquò, perdètz pas esper. Seguissetz-me puslèu –que la victòria de mon Còr es dins lo nom de Dieu. Mon Filh tant-aimat pensa a vosautres coma a totjorn pensat a vosautres. Cresètz-LO e vivètz-Lo ! Es la vida dau mond. Mos enfants, viure mon Filh vòl dire viure l’Evangèli. Aquò es pas aisit. Aquòl vòl dire amor, perdon, e sacrifici. Aquò purifica e dobrís lo Reialme. La pregària sincèra, que consistís pas sonque en de mots mas en una pregària facha amb lo còr, vos ajudarà, atanben lo june, que es tanben amor, perdon e sacrifici. Es per aquò, perdètz pas espèr mas seguissètz-me. Vos prègui tornarmai de pregar per vòstres pastres, per fins qu’agachan totjorn cap a mon Filh qu’èra lo primièr Pastre dau mond e que sa familha èra lo mond sencèr. Vos grandmercegi. »

Marija, messatge dau 25 de novembre de 2014

« Enfants carits, vos vòli convidar uòi, d’un biais particular, a la pregària. Pregatz, enfantons, per poder entendre qual siatz e ont devètz anar. Siaguètz de portaires de Bona Novèla e de mond d’esperança. Siaguètz amor per totes aqueles que son sens amor. Enfantonèls, seretz tot e compliretz tot  solament se pregatz e se siatz dobèrts a la volontat de Dieu, de Dieu que vos desira menar a la vida eternala. Siái amb vautres e intercedissi per vautres jorn a cha  jorn davant mon Filh Jèsus. Mercés d’aver respondut a ma crida. »

Mirjana, messatge dau 2 de novembre de 2014

« Enfants carits, siái amb vosautres amb la benediccion de mon Filh, amb vosautres que m’aimatz e qu’ensajatz de me seguir. Vòli tanben èsser amb vosautres que m’aculhissètz pas. A vosautres totes, dobrissi mon Còr comol d’amor e vos benesissi de mas mans mairalas. Siái una maire que vos compren. Visquèri la vòstra vida, patiguèri vòstras sofrenças e ressentiguèri vòstres gauges. Vosautres que vivètz una sofrença, comprenètz ma dolor e mon patiment per aqueles de mos enfants que daissan pas la lutz de mon Filh los esclairar ; aqueles de mos enfants que vivon dins las tenèbras. Es per aquò que me fasètz mestièr vosautres que sètz estats esclairats per la lutz e qu’avètz compresa la vertat. Vos convidi a adorar mon Enfant per que vòstra arma cresca e tòque una espiritualitat vertadièira. Mos apòstols, es alara que seretz capables de m’ajudar. M’ajudar significa pregar per aqueles qu’an pas encara conogut l’amor de mon Filh. En pregant per eles, mostratz a mon Enfant que l’aimatz e que lo seguissètz. Mon Filh me prometèt que jamai lo mal vencerà pas per que, vautres, armas dels justs, aquí sètz ; vosautres qu’ensajatz de dire vòstras pregàrias amb lo còr, vosautres qu’ofrissètz vòstras dolors, vòstres patiments a mon Filh ; vosautres qu’entendètz que la vida es pas qu’una guinhada ; vosautres que vos languissètz aprèp lo Realme dau Cèl. Vejatz-aquí tot çò que fai de vosautres mos apòstols e vos mena cap al trionf de mon Còr. Es per aquò mos enfants, purificatz vòstres còrs e adoratz mon Enfant. Vos grandmercegi. »